पेण तालुक्यातील पाटणेश्वर परिसरातील आदिवासी वाडीत पाच वर्षीय मुलीचा मृतदेह मंगळवारी सकाळी आढळून आल्याने परिसरात मोठी खळबळ उडाली आहे. मुलगी सोमवारी रात्रीपासून बेपत्ता होती. मंगळवारी सकाळी साडेआठच्या सुमारास पेण पोलिसांना याबाबत माहिती मिळताच पोलिसांचे शोधपथक व श्वानपथक घटनास्थळी दाखल झाले. ग्रामस्थांच्या मदतीने शोधमोहीम राबविण्यात आली. त्यानंतर वस्तीपासून सुमारे १०० मीटर अंतरावर मुलीचा मृतदेह नग्न अवस्थेत आढळून आला.
रायगड जिल्हा पोलीस अधीक्षक अंचल दलाल व उपअधीक्षक अभिजीत शिवथरे यांच्या मार्गदर्शनाखाली पेणचे उपविभागीय पोलीस अधिकारी जालिंदर नालकुल व पोलीस निरीक्षक संदीप भोसले यांनी तपासाची चक्रे वेगाने फिरवत संशयित किरण भिकू वाघमारे याला ताब्यात घेतले आहे.
मृतदेह शवविच्छेदनासाठी पेण उपजिल्हा रुग्णालयात पाठविण्यात आला असून शवविच्छेदन अहवाल आल्यानंतर पुढील गुन्ह्याचे स्वरूप स्पष्ट होईल अशी माहिती पोलीस अधीक्षक आंचल दलाल यांनी दिली.
कोणत्याही टिप्पण्या नाहीत:
टिप्पणी पोस्ट करा