नवी मुंबईतील नेरुळ येथील समाजसेवक भालचंद्र माने यांचा अभिनव उपक्रम ; भजनी मंडळाला चहाची किटली देऊन केली मानव सेवेची सुरुवात

नेरूळ( सुभाष हांडे देशमुख) कोकणातील गणेशोत्सव म्हणजे प्रत्येक घरातला गणेशाप्रती श्रद्धेचा, आनंदाचा एक आगळावेगळा सोहळा असतो. महाराष्ट्रात सर्वदूर नोकरी व्यवसाय निमित्ताने गेलेले ग्रामस्थ श्री गणेशाच्या प्रेमापोटी मिळेल त्या वाहनाने आपापल्या गावी गणेशोत्सवामध्ये पोहोचतात आणि गणेशाची प्रतिष्ठापना करून मनोभावे पूजाअर्चा करतात. प्रत्येक गावागावात, वाडीमध्ये भजनी मंडळ कार्यरत असतात आणि ते घरोघर जाऊन गणेशाच्या आरत्यां टाळ मृदुंगाच्या साथीने म्हणतात आणि वातावरणातील पावित्र्य जपतात. तो एक आनंदाचा, भक्तीचा सोहळाच ठरतो. तिथे ना आमंत्रणाची गरज असते ना चहापाण्याची अपेक्षा. निरपेक्षपणे प्रसंगी पदरमोड करून आणि उत्साहाने आपली सेवा उपलब्ध करून देतात. खरं तर या भक्तांचे आरत्या म्हणण्यासाठी घरोघर फिरणं होत असल्याने त्यांना चहा नाश्त्याची आवश्यकता असते पण गाव खेड्यात ते त्या कुटुंबातील प्रत्येकाला देणे शक्य होत नाही. भालचंद्र माने यांनी याचा सखोल विचार करून प्रत्येक मंडळाच्या सोबत चहाची मोठी किटली चहा भरुन सोबत असेल तर त्यांना कमीत कमी चहा सहजपणे उपलब्ध होऊ शकेल, हा प्रगल्भ विचार करून त्यांनी चहाच्या किटल्या वाटण्याचा विचार मित्रांकडे मांडला आणि तो सर्वांनी उचलून धरला आणि भालचंद्र माने यांनी आपल्या स्वतःपासून या सेवेची प्रथम सुरुवात केली व ग्रामस्थांमध्ये एक आदर्श निर्माण केला.

   संगमेश्वर तालुक्यातील बोरसुत येथील तांबलवाडीत भजन मंडळाला विनय खामकर यांच्या घरी चंद्रकांत खामकर (अप्पा), भजनी बुवा रमण खामकर, भजनी बुवा प्रदीप शिंदे, योगेश अढटराव , विनय खामकर आणि बहुसंख्येने ग्रामस्थ व चाकरमानी यांच्या उपस्थितीत भालचंद्र माने यांनी चहाची किटली भेट दिली. आणि या उपक्रमाचा श्री गणेशा केला. ही चहाची किटली नामवंत कंपनीची असून त्यात दहा तास गरम पेय राहते. गणपती उत्सवात भजन मंडळी घरोघरी भजन करतात. त्यावेळेला चहाचा कार्यक्रमाला घरातील महिला व सदस्यांना कमी त्रास होईल व चहा घेण्यास भक्तमंडळींना सोयीस्करही होईल. तसेच इतर वेळीही वाडीतील कोणत्याही कार्यक्रमाला चहा घेऊन जाण्यास आणि तो देण्यास किटलीचा उपयोग होईल. भालचंद्र माने यांच्या या सेवाभावी वृत्तीमुळे त्यांचे कौतुक होत आहे. उपजतच सेवाभावी वृत्ती असलेले भालचंद्र माने नेरुळ येथील यूथकौन्सिल या सेवाभावी संस्थेसोबत कार्यरत असल्यामुळे ही त्यांची सेवावृत्ती अधिक वाढीस लागली. यूथकौन्सिल नेरुळ ही संस्था वर्षभर अशाप्रकारे समाजहितैशी सेवाभावी उपक्रम सातत्याने राबवत असते. त्यातूनच ही एक प्रेरणा आणि ती दृष्टी मला मिळाली असे भालचंद्र माने अभिमानाने सांगतात. भविष्यात सुद्धा असे छोटे मोठे कार्यक्रम गाव आणि वाडीच्या विकासासाठी करण्याचे स्वप्न आहे. गाव खेड्यातील लोकांना गरम गरम चहा या पेयाचे जास्त आकर्षण आहे. त्यासाठी स्थानिक लोकप्रतिनिधींनी भजन मंडळ, सार्वजनिक सेवा केंद्र येथे चहा गरम राहील अशी त्यांचे नावं फोटोसह किटलीचे वाटप केले तर त्यांचे नाव होईल आणि तो समाजउपयोगी असा चांगला उपक्रमही ठरेल. गावातील होतकरू युवकांना रोजगारही उपलब्ध होऊ शकेल. त्याचप्रमाणे गरम चहा मिळेल अशी उपलब्धता गावातील लहान मोठे जिथे काम करणाऱ्या कामगारांना किंवा एखाद्या छोट्या मोठ्या कार्यक्रमाला त्यांचा व्यवसाय होऊ शकतो. उत्तम प्रतीच आलं, चहापत्तीचा मसाला असा गरम चहा त्या त्या भागात प्रसिद्ध झाला तर स्थानिक व्यक्तीला रोजगार मिळेल असेही ते सुचित करतात.

  गणेशोत्सवाप्रमाणेच ग्राम पातळीवर वेळोवेळी विविध धार्मिक उत्सव, सण सातत्याने साजरे केले जातात. त्यामुळे भालचंद्र माने यांचा हा उपक्रम नक्कीच अधोरेखित ठरावा.

जनरत्न प्रतिभा भूषण पुरस्काराचे आयोजन

नवी मुंबई( विरेंद्र म्हात्रे ) : महाराष्ट्र लोक कल्याणकारी सेवा संस्थेच्या विशेष सहकार्याने इनोव्हेटिव्ह मानबिंदू प्रकाशन व अमरदीप बालविकास फाऊंडेशन यांच्या संयुक्त विद्यमाने राष्ट्रीय व राज्यस्तरीय कार्य प्रतिमा महासंमेलन" चे आयोजन करण्यात आलेले आहे. सदरहु कार्यक्रमात विविध क्षेत्रात अतुलनीय व उल्लेखनीय कार्य करणारे सेवाव्रतींना "जनरत्न प्रतिभा भूषण पुरस्काराने"दिग्गज मान्यवरांचे हस्ते सन्मानित करण्यात येणार आहे. हा पुरस्कार सोहळा रविवारी दिनांक 8 आक्टोंबर 2023 रोजी सकाळी 10.30 वाजता वाशी, नवीमुंबई येथे पार पडणार आहे.

     तरी इच्छुकांनी आपली संपूर्ण माहिती व स्पष्ट कलर फोटो 15 संप्टेबर 2023 पर्यंत Whats up क्रमांक 922430281/ 8691828826वर पाठविण्याचे आवाहन टि.म.जि. क्रीयेशनचे अध्यक्ष नसीम खान यांनी केले आहे...

कोपरखैरणे येथे संवाद नात्याचा कविता डॉट कॉम संमेलन संपन्न

नवी मुंबई(सुभाष हांडे देशमुख):नवी मुंबईतील कोपरखैरणे येथील रा. फ. नाईक महाविद्यालयाच्या प्रांगणात संवाद नात्यांचा *कविता डॉट कॉम* संमेलन ३१ ऑगस्ट २०२३ रोजी उत्साही वातावरणात संपन्न झाले. नेरुळ जेष्ठ नागरिक संघाचे कोषाध्यक्ष व ग्रंथालयाचे अध्यक्ष विकास साठे यांच्या प्रमुख उपस्थितीत पार पडलेल्या या संमेलनात मांन्यवर व नवोदित कवींनी आपल्या कविता उत्स्फूर्तपणे सादर केल्या.

      महाविद्यालयाचे प्राचार्य रवींद्र पाटील यांच्या पुढाकाराने आणि मार्गदर्शनाखाली पार पडलेल्या या *कविता डॉट कॉम* मासिक संमेलनात नवोदित कवींनी अत्यंत आत्मविश्वासाने कविता सादर केल्या.

      विकास साठे उपस्थितांशी संवाद साधताना म्हणाले की, साहित्य हा समाजाचा आरसा असतो. त्यामध्ये समाजातल्या ताणतणावांचे, त्यांच्या प्रश्नांचे व सांप्रत वातावरणाच प्रतिबिंब उमटणे गरजेचे असते. एक सामाजिक बांधिलकी म्हणून साहित्यिकाने *जागल्याची* भूमिका परखडपणे, बेडरपणे पार पडणे गरजेचे आहे. आजच्या नवोदित साहित्यिकांनी साहित्यनिर्मिती करताना खूप वाचन करणं गरजेचे आहे. एकविसावे शतक हे माहितीचे युग आहे . अत्यंत सजगतेने समाजातील निरीक्षणे नोंदवली पाहिजेत. वाचनाने त्यांची शब्दसंपदा वाढेल, अनुभवाच्या कक्षा रुंदावतील. रामदास स्वामी म्हणतात *दिसा माजी थोडेतरी लिहीत जावे* त्याप्रमाणे लिखाणामध्ये सातत्य असणं गरजेचं आहे, आणि *प्रगटावे अभ्यासुनी* या उक्तीप्रमाणे लिहिलेलं साहित्य कसदार असावं. आद्य कवी मुकुंदराज १२ व्या शतकात होऊन गेले. सुरुवातीचं साहित्य संत काव्य, अनुवादित साहित्य, लोकसाहित्य, कीर्तन, भारुड, ओव्या इत्यादी स्वरूपात होतं . ते आता वेगवेगळ्या आकृतीबंधात, मुक्त काव्य, गझल चारोळ्या पर्यंत त्याची प्रगती झाली आहे. एकंदरीत, साहित्य संमेलनात सादर केलेल्या सर्व कवितांचा साहित्यिक दृष्टिकोनातून आढावा घेऊन नवोदित कवींना मार्गदर्शन केले. 

अत्यंत खेळीमेळीच्या वातावरणात कविता डॉट कॉम चे मासिक साहित्य संमेलन संपन्न झाले. 

सत्यम इंटरनॅशनलच्या वतीने फुटबॉल स्पर्धेचे आयोजन

उरण दि 26 ( विठ्ठल ममताबादे ) उरण तालुक्यातून उत्तमोत्तम व गुणवंत खेळाडू तयार व्हावेत आणि हे खेळाडू राज्यस्तरीय व राष्ट्रीय स्तरावर चमकावेत या दृष्टीकोनातून तसेच खेळाडूंना उत्तम व्यासपीठ मिळवून देण्याच्या अनुषंगाने सत्यम इंटरनॅशनल या संस्थेतर्फे रविवार दि. 27/8/2023 रोजी सकाळी 10 ते संध्याकाळी 6 या वेळत उरण शहरातील स्वातंत्र्यवीर सावरकर मैदान येथे तालुका स्तरीय फुटबॉल स्पर्धेचे आयोजन करण्यात आले आहे. जास्तीत जास्त रसिक प्रेषकांनी, नागरिकांनी या स्पर्धेचा आस्वाद घेऊन खेळांडूचा आनंद द्विगुणीत करावा असे आवाहन सत्यम इंटरनॅशनल या संस्थेतर्फे करण्यात आले आहे.

नेरुळ येथे ज्येष्ठ नागरिकांसाठी मोफत आरोग्यसेवा शिबिराचा शुभारंभ

नवी मुंबई (सुभाष हांडे देशमुख):नवी मुंबई मधील नेरुळ येथील ज्येष्ठ नागरिक संघ या सेवाभावी संस्थेच्या नेरुळ रुग्णसेवा केंद्राच्या माध्यमातून ज्येष्ठांसाठी मोफत आरोग्य तपासणी सेवेचा शुभारंभ रविवार दिनांक २० ऑगस्ट २०२३ पासून डॉ. अवधूत विकास साठे, एमडी, आयुर्वेद यांनी जेष्ठनागरिकांच्या शरीरस्वास्थ्यासाठी आपली मोफत रुग्णसेवा प्रदान केलेली आहे. त्याचा शुभारंभ रुग्णसेवा केंद्राचे अध्यक्ष रणजीत दीक्षित यांच्या हस्ते ज्येष्ठ नागरिकांच्या उपस्थितीत केंद्राच्या सभागृहात मोठ्या उत्साही वातावरणात संपन्न झाला.

    या कार्यक्रमाप्रसंगी सर्वश्री. दत्ताराम आंब्रे, विजय सावंत, रमेश गायकवाड, नंदलाल बॅनर्जी, दिलीप जाधव, किरण देशपांडे, श्री. राव, रूपाली माहुलकर, विकास साठे, श्री. राजेश ( केटरर्स) इत्यादी मान्यवर उपस्थित होते. सर्व मान्यवरांनी रुग्णसेवेच्या या उपक्रमाचे कौतुक केले व हार्दिक शुभेच्छा दिल्या.  

   याप्रसंगी जेष्ठ नागरिकांशी संवाद साधताना रणजीत दीक्षित म्हणाले की, डॉ. अवधूत साठे अत्यंत सेवाभावी डॉक्टर असून प्रत्येक रविवारी सकाळी दहा ते बारा या वेळेमधे आपली वैद्यकीय सेवा आपल्या रुग्णसेवा केंद्रात येऊन ते देणार आहेत. याचा फायदा आपल्या ज्येष्ठ नागरिकांना नक्कीच होईल. असं सांगून रुग्णसेवा केंद्राची माहिती देताना ते म्हणाले की, गरजू रुग्णांसाठी मोफत वैद्यकीय उपकरणे जसे की, बेड, व्हील चेअर, टाँयलेट व युरिन पाँट, स्टीक कुबड्या, नेबुलायझर, ऑक्सीजन मशीन आदींची उपलब्धता तसेच अँक्युप्रेशर डाँक्टर व मोफत आयुर्वेदिक डाँक्टर चेकअप आदी सेवाही वेळोवेळी ज्येष्ठ नागरिकांना पुरविल्या जातात.

वीर वाजेकर महाविद्यालयाच्या प्राणिशास्त्र विभाग व फ्रेंड्स ऑफ नेचर यांचा जासई येथे "सर्प दंश शून्य मृत्यू" अभियान संपन्न

वीर वाजेकर महाविद्यालयाच्या प्राणिशास्त्र विभाग व फ्रेंड्स ऑफ नेचर यांचा जासई येथे "सर्प दंश शून्य मृत्यू" अभियान संपन्न. दि १९(विठ्ठल ममताबादे )रयत शिक्षण संस्थेच्या वीर वाजेकर आर्ट्स सायन्स व कॉमर्स महाविद्यालय, महालण विभाग, फुंडे च्या प्राणिशास्त्र विभाग व फ्रेंड्स ऑफ नेचर च्या वतीने छत्रपती शिवाजी हायस्कूल व लोकनेते दि. बा. पाटील ज्युनिअर कॉलेज जासई येथील विद्यार्थ्यांसाठी सर्प साक्षरता अभियान घेण्यात आले. नुरा शेख ह्यांनी पाहुण्यांची ओळख करून दिली.तर प्राचार्य अरूण घाग यांनी मान्यवरांचे स्वागत केले.कार्यक्रमाचे प्रास्ताविक वीर वाजेकर कॉलेजचे प्राणिशास्त्र विभाग प्रमूख, डॉ आमोद ठक्कर यांनी केले त्यात त्यांनी सर्प त्यांची संख्या, विषारी बिन विषारी व निमविषारी असतात ह्याची माहिती दिली. सर्प दंश मुळे साधारणतः सरकारी आकड्यांनुसार दर वर्षी ६० हजार मृत्यू होतात नोंद नसलेली आकडेवारी आणखीन मोठी आहे. हे मृत्यु अनेक वेळेस अज्ञान, अंधश्रद्धा चुकीच्या उपचार पद्धती चा वापर किंवा वेळेत योग्य उपचार न मिळणे अशी अनेक कारणे आहेत जी आपण सर्प साक्षरतेचे धडे घेऊन सर्प दंश शुन्य मृत्यू अभियानाला हातभार लावुन कमी करावे असे आवाहन केले.

     

प्रमुख वक्ते फ्रेंडस ऑफ नेचरचे जयवंत ठाकूर ह्यांनी विषारी सर्प नाग, मण्यार, घोणस, फुरसे, चापडा, समुद्र सर्प यांना कसे ओळखायचे, त्यांचा खुराक सवयी इत्यादींची सविस्तर माहिती दिली. तसेच निमविषारी व अनेक बिनविषारी सर्प ह्यांची ही सचित्र ओळख करून दिली. सर्प मानवाचा मित्र कसा आहे ह्याची विस्तृतपणे माहिती करून दिली. सर्प दंश होऊच नये ह्यासाठी घ्यावयाची काळजी ही माहीत करून दिली. सर्पदंश झाल्यावर प्राथमिक उपचार कसे करावेत व तात्काळ वैद्यकीय उपचाराची आवश्यकता का आहे व ती मिळेपर्यंत घ्यावयाची काळजी प्रात्यक्षिक सहित दाखवली जेणेकरून सर्प दंश शून्य मृत्यू अभियान यशस्वी होईल असे सांगितले. कार्यक्रमाच्या नियोजनात शाळा विकास समितीचे अध्यक्ष तथा कामगार नेते सुरेश पाटील ह्यांचे विशेष सहकार्य लाभले. 

सदर कार्यक्रमास विद्यार्थ्यांचा उत्स्फूर्त प्रतिसाद लाभला.

      कार्यक्रम यशस्वी करण्यासाठी प्रा. पंकज भोये,निकेतन ठाकूर, माजी विद्यार्थी आणि फॉन (फ्रेंड्स ऑफ नेचर )संस्थेचे पदाधिकारी,सदस्य ह्यांचे सहकार्य लाभले. शुभांगी ठाकूर यांनी आभार प्रदर्शन केले.जासई शैक्षणिक संकुलातील पर्यवेक्षक जितेकर मॅडम, मोकल मॅडम, बाबर मॅडम, हुद्दार मॅडम व शिक्षक वर्ग मोठ्या संख्येने यावेळी उपस्थित होते.

महाराष्ट्र पोलीस बॉईज संघटनेतर्फे विद्यार्थ्यांना शैक्षणिक साहित्याचे वाटप

उरण दि 19(विठ्ठल ममताबादे )महाराष्ट्र पोलीस बॉईज संघटना उरण यांच्या वतीने उरण येथील नाईक नगर झोपडपट्टीत गरजू विद्यार्थ्यांना शाळेपयोगी शैक्षणिक साहित्याचे वाटप करण्यात आले.या वेळी उरण पोलीस स्टेशनचे वरिष्ठ पोलीस निरीक्षक सतिश निकम यांनी उपस्थितांना मार्गदर्शन केले.कोणाला काही अडचण असेल, समस्या असेल तर पोलीस स्टेशनला संपर्क साधण्याचे त्यांनी आवाहन केले.या प्रसंगी आदर्श शिक्षिका सुनंदा कुमार मॅडम यांचा वाढदिवस सुद्धा साजरा करण्यात आला.या प्रसंगी महाराष्ट्र पोलीस बॉईज संघटनेचे गणेश पाटील, वैभव पवार,राजेश म्हात्रे, प्रशांत भोईर,जयेश मोकल,रवि मोकल,स्वप्नील कुंभार यांच्यासह विविध मान्यवर उपस्थित होते. पप्पू सूर्यराव यांनी सर्वांचे आभार मानून कार्यक्रमाची सांगता केली.

विरेंद्र यशवंत म्हात्रे यांना रत्नश्री पुरस्कार 2023 ने सन्मानित

नवी मुंबई : राष्ट्रीय बाल आणि महिला विकास परिषदच्या मान्यतेने रत्नश्री पुरस्कार 2023 सन्मान राष्ट्रीय बाल आणि महिला विकास परिषदेच्या वतीने नवी मुंबई तील राष्ट्रीय बाल आणि महिला विकास परिषदेचे महाराष्ट्र राज्याचे जॉइंट सेक्रेटरी विरेंद्र यशवंत म्हात्रे यांना ‘रत्नश्री पुरस्कार 2023ने सन्मानित करण्यात आले. सन्मानचिन्ह, मानपत्र व शाल असे पुरस्काराचे स्वरूप होते. ही निवड राष्ट्रीय बाल आणि महिला विकास परिषदेचे राष्ट्रीय अध्यक्ष डॉ. बिरेन दवे व राष्ट्रीय बाल आणि महिला विकास परिषदेचे राष्ट्रीय उपाध्यक्ष मा. रचना भीमराजका आणि राष्ट्रीय बाल आणि महिला विकास परिषद चे राष्ट्रीय संचालक. आणि राष्ट्रीय मानवी हक्क आणि भ्रष्टाचार विरोधी दल चे राष्ट्रीय सचिव मा. माया ठाकुर यांनी केली आहे.

   विरेंद्र म्हात्रे हे राष्ट्रीय बाल आणि महिला विकास परिषदेचे महाराष्ट्र राज्याचे जॉइंट सेक्रेटरी आणि लायन हार्ट ग्रुप नवी मुंबई चे संस्थापक/अध्यक्ष आहेत. गेल्या दहा वर्षांपासून ते समाजसेवा करत असून अतिशय कष्टातून आणि शून्यातून वाटचाल करत म्हात्रे यांनी आपला समाजसेवा वाढवला आहे. यात लायन हार्ट ग्रुप नवी मुंबई च्या सदस्य यांची चांगली साथ लाभत आहे. त्यांचा हा समाजसेवेतील ठसा नवी मुंबई व महाराष्ट्राबाहेरही विस्तारला आहे.

चैतन्य नवनीत पाटील याचे सुयश

उरण (विठ्ठल ममताबादे )उरण तालुक्यातील धुतुम येथील सामाजिक कार्यकर्ते स्वांतत्र्य सेनानी, स्वर्गीय रामदास शेठ नारायण ठाकूर यांचे पणतू व नवनीत शांताराम पाटील यांचे सुपुत्र चैतन्य नवनीत पाटील राहणार मोरावे याने यूजीसी नेट परीक्षेत फिजिक्स या विषयात राष्ट्रीय पातळीवर घेण्यात आलेल्या परीक्षेत तृतीय क्रमांक पटकावला आहे .या आधी त्याने बिट्स पिलानी या नामांकित संस्थेतून एम.एससी फिजिक्स आणि इलेक्ट्रॉनिक या विषयात इंजिनिअरची पदवी घेतली आहे. त्याने पुढे फिजिक्स या विषयात संशोधन करायचे ठरवले आहे.चैतन्य पाटील यांनी राष्ट्रीय पातळीवर फिजिक्स विषयात तृतीय क्रमांक पटकविल्याने त्यांचे सर्वत्र कौतुक व अभिनंदन होत आहे. विविध मान्यवरांनी प्रत्यक्ष भेटून तर अनेक मान्यवरांनी त्यांना व्हाट्सअप, फेसबुक या सारख्या सोशल मीडिया द्वारे त्यांचे अभिनंदन करत शुभेच्छा दिल्या आहे.

उरण येथे लवकरच वरिष्ठ स्तर न्यायालय स्थापन होणार.- अँड.दत्तात्रेय नवाळे

उरण (विठ्ठल ममताबादे )उरण न्यायालयामधे लवकरच वरिष्ठ स्तर न्यायालय स्थापन होणार असल्याचे उरण वकिल संघटनेचे अध्यक्ष अँड. दत्तात्रेय नवाळे यांनी सांगितले. उरण तालुक्यातील रूपये पाच लाख रक्कमेच्या वरील दिवाणी दाव्या मधील पक्षकार आणि त्यांचे वकिल यांना पनवेल येथे येण्या जाण्या करता होणारा त्रास वाचवण्याकरता उरण येथे वरिष्ठ न्यायालय स्थापन होणे गरजेचे झाले आहे. पनवेल येथील वरिष्ठ न्यायालयामधे उरण, पनवेल, कर्जत व खालापुर येथील ४ न्यायालयांचे दिवाणी दावे, दिवाणी अर्ज, भुसंपादनाचे अर्ज यांचे विषयी कामकाज चालत असते. त्यामधे अधिकाअधिक काम उरण तालुक्यामधुन आलेले असते. पनवेल येथे जाणे येणे करता संबंधीत वकील व पक्षकार यांना जवळ जवळ ५० कि.मी.चा प्रवास करावा लागतो. त्यामुळे प्रवासातच त्यांचा पैसा व वेळ वाया जातो व त्यामुळे त्यांची गैरसोय होते. सदरची गैरसोय टाळण्याकरता उरण येथे वरिष्ठ न्यायालयाची स्थापना होणे गरजेचे आहे. हे लक्षात घेऊन उरण न्यायालयाचे अध्यक्ष व त्यांचे कार्यकारीणीने उरण न्यायालयामधे वरिष्ठ स्तर न्यायालय स्थापने करता कार्यकारीणीचे सभेमधे ठराव मंजुर करून सदरचा ठराव जिल्हा न्यायालय अलिबाग यांच्या कडे पाठविला. जिल्हा न्यायालय अलिबाग यांनी सदरचा प्रस्ताव उरण न्यायालयाचे पनवेल येथील वरिष्ठ न्यायालयामधे चालविले जाणारे सर्व दिवाणी अर्जाची व दाव्याची माहिती मागवुन उच्च न्यायालय मुंबई यांच्याकडे मंजुरी करता पाठविला आहे.

   उरण येथे वरिष्ठ स्तर न्यायालय स्थापन करण्याकरता लागणारी दाव्याची संख्या पुरेशी असल्यामुळे नियमाप्रमाणे उच्च न्यायालय मुंबई सदरची बाब मंजुर करण्याची अपेक्षा आहे. त्यामुळे आता वकिल व पक्षकार यांना पनवेल न्यायालयामधे जाण्याकरता लागणारा वेळ व पैसा वाचणार आहे.या करता उरण न्यायालयाच्या वकिल संघटनेचे अध्यक्ष अँड दत्तात्रेय नवाळे, उपाध्यक्ष अँड भारती भोईर, उपाध्यक्ष अँड किशोर ठाकुर,अँड.प्रसाद पाटील, सचिव अँड.अर्चना माळी,अँड प्रतिभा भालेराव,उपसचिव अँड. संतोष पाटील, लेखापरीक्षक तसेच अँड अझीमीन अन्सारी ,अँड वृषाली पाटील,अँड.विपुल ठाकुर,अँड धिरज डाकी सर्व सदस्य तसेच वरिष्ठ वकिल अँड एम.एम. मोकल,अँड मोहन थळी,अँड. भानुशाली वगैरे वकिलांनी मोलाचे सहकार्य केले आहे.

स्वातंत्र्यदिनाचे औचित्य साधुन जिल्हा अध्यक्ष महेंद्रशेठ घरत यांच्या हस्ते उलवे नोड मध्ये जेष्ठ नागरिक विरंगुळा केंद्र व वृत्तपत्र वाचनालयाचे उदघाट्न.

उरण(विठ्ठल ममताबादे )सध्या उलवे नोड परिसर झपाट्याने विकसित होत असतांना मोठया प्रमाणाने नागरिक उलवे नोड मध्ये वास्तव्यास येत आहेत. अश्यातच नागरिकांना पुरविण्यात येणा-या सेवा सुविधा दर्जेदार असाव्यात याकडे कटाक्षाने लक्ष देतानाच समाजातील सर्व लहान थोर घटकांना आवश्यक सेवा मिळाव्यात ही भूमिका सुरुवातीपासून जपली असून जेष्ठ नागरिकांसाठी उलवे नोड सेक्टर १६ व १७ येथील विरंगुळा केंद्र ज्येष्ठांना आनंद देईल अशा शब्दात मनोगत व्यक्त करीत रायगड जिल्हा अध्यक्ष महेंद्रशेठ घरत यांनी आपला विश्वास व्यक्त केला.ज्येष्ठ नागरिक विरंगुळा केंद्र उदघाट्न समारंभ आणि वृत्तपत्र वाचनालय नामकरण समारंभ प्रसंगी त्यांनी आपले मनोगत व्यक्त केले.याप्रसंगी पप्पुशेठ घरत, युवा नेते कुणाल महेंद्रशेठ घरत,उरण विधानसभा युवक अध्यक्ष, रोहित घरत जेष्ठ नेते आझाद वतारे,कोकण विभाग ओबीसी अध्यक्ष शंभु म्हात्रे,उलवे नोड अध्यक्ष आर आर सिंग,शेखर देशमुख, काशिनाथ कोळी, गव्हाण विभाग काँग्रेस अध्यक्ष अश्विन नाईक, किरण पाटील, आनंद ठाकूर,मयुरेश घरत गोरख कांबळे,जयपाल वाल्मिकी,

अशोक हरणोल,कानराम प्रजापती,शामलाल कोठारी ,मोहन राठोड, आनंद ढेकले, मोनीश शेट्टी,संतोष निंबाळकर,अनिकेत भिंगारदिवे तसेच मोठया संख्येने जेष्ठ नागरिक, महिला,काँग्रेस कार्यकर्ते व परिसरातील नागरिक उपस्थित होते.

   

यावेळी बोलताना महेंद्रशेठ घरत यांनी सांगितले कि उरण - पनवेल मधील प्रकल्पग्रस्त गावांना व उलवेनोड मध्ये सिडकोकडून पाणी पुरवठा, घनकचरा व्यवस्थापन, सांडपाणी व्यवस्थापन, शिक्षण, आरोग्य, उद्यान, मैदाने नागरिकांसाठी आवश्यक सुविधा पुर्ततेकरीता मी नेहमी आग्रही राहिलो आहे असेही ते म्हणाले.उलवे नोड परिसरातील ज्येष्ठ नागरिकांसाठी भेटीगाठींचे, सुसंवादाचे एक चांगले ठिकाण या ज्येष्ठ नागरिक विरंगुळा केंद्राच्या माध्यमातून उपलब्ध होत असल्याबद्दल नागरिकांनी जिल्हा अध्यक्ष महेंद्रशेठ घरत यांचे आभार मानले.यावेळी सेक्टर १६ /१७ मधील चौकास के एन घरत असे नाव देण्यात आले त्यांचे उदघाटन महेंद्रशेठ घरत यांच्या शुभहस्ते करण्यात आले.

माझी माती, माझा देश' या अभियानांतर्गत उरण नगर परिषद तर्फे उरणमध्ये विविध देशभक्तीपर उपक्रमांचे आयोजन

उरण (विठ्ठल ममताबादे )'माझी माती, माझा देश' हे अभियांनांतर्गत उरणमध्ये विविध देशभक्तीपर उपक्रमांचे आयोजन केले होते.स्वातंत्र्याच्या अमृत महोत्सवी वर्षाच्या समारोपानिमित्त देशाचे पंतप्रधान मा.श्री. नरेंद्रजी मोदी यांच्या संकल्पनेतून देशासाठी बलिदान देणाऱ्या वीर- वीरांगणांना श्रद्धांजली अर्पण करण्यासाठी देशभरात "माझी माती, माझा देश" हे देशभक्तीपर अभियान राबविण्यात येत आहे. या अभियाना अंतर्गत देशभरात विविध उपक्रमांचे आयोजन करण्यात येत आहे. याचाच एक भाग म्हणून उरण नगरपरिषदेच्या सौजन्याने 'माझी माती, माझा देश' अभियानांतर्गत शिलाफलकाचे लोकार्पण व शहीद वीरांच्या कुटुंबाचा सत्कार करण्यात आला. तसेच कोविड काळात "कोविड योद्धा" म्हणून सेवा बजावली त्याबद्दल उरण नगरपरिषद शाळेमधील कर्मचाऱ्यांना प्रमाणपत्रक देऊन सन्मानित करण्यात आले.तसेच उपस्थित मान्यवरांसोबत स्मृतिप्रीत्यर्थ स्थापित शिला फलकाचे अनावरण आमदार महेश बालदी यांच्या हस्ते झाले.तसेच रहाळकर मैदान येथे वृक्षारोपण करुन अमृत वाटिका तयार करण्यात आली.

     

सदर कार्यक्रमास राहुल इंगळे- मुख्याधिकारी उरण नगरपरिषद, लेखपाल - सुरेश पोस तांडेल , नगर रचनाकार सचिन भानुसे, प्रशासकीय अधिकारी अनिल जगधनी,कर निरीक्षक संजय ढापसे,आरोग्य निरीक्षक हरेश तेजी तसेच माजी नगराध्यक्ष सायली म्हात्रे, गटनेते रवी भोईर, नगरसेवक कौशिक शाह,नगरसेवक राजू ठाकूर, जसिम गॅस व उरण नगरपरिषद मधील अधिकारी/ कर्मचारी यांसह अनेक मान्यवर उपस्थित होते. बँक ऑफ महाराष्ट्र चे अधिकारी यांनी वृक्षारोपण कार्यक्रमास उपस्थित राहून वृक्षा रोपण केले.

उरण तालुका मराठी पत्रकार संघाच्या अध्यक्षपदी घन:श्याम कडू यांची फेरनिवड

उरण दि १८(विठ्ठल ममताबादे ) उरण तालुका मराठी पत्रकार संघाच्या अध्यक्षपदी घन:श्याम दामोदर कडू यांची फेरनिवड करण्याचा निर्णय बैठकीत घेण्यात आला. अध्यक्षपदी घनश्याम कडू यांची फेरनिवड झाल्याबद्दल त्यांच्यावर अभिनंदनाचा वर्षाव होत आहे. यावेळी पत्रकार संघाचा ३७ वा वर्धापनदिन उत्साहात साजरा करण्यात आला.

     उरण तालुका मराठी पत्रकार संघाचा ३७ वा वर्धापन दिन पत्रकार संघाच्या कार्यालयात जेष्ठ पत्रकार हसमुख भिंडे यांच्या अध्यक्षतेखाली साजरा करण्यात आला. यावेळी अहवालाचे वाचन करून त्याला सर्वानुमते संमती देण्यात आली. त्यानंतर मान्यवरांच्या निधनानिमित्त त्यांना श्रद्धांजली वाहण्यात आली. यावेळी पत्रकार संघाला मदत करणाऱ्यांचे व विविध क्षेत्रात भरीव कामगिरी करणाऱ्यांचेही अभिनंदन करण्यात आले.

    त्यानंतर पत्रकार संघाचे अध्यक्ष घन:श्याम कडू यांनी केलेल्या कार्याची दखल घेऊन कार्यकारणीने पुन्हा त्यांची अध्यक्षपदी फेरनिवड करण्याचा निर्णय घेण्यात आला. पत्रकार संघाच्या अध्यक्षपदी घन:श्याम कडू यांची फेरनिवड होताच त्यांच्यावर अभिनंदनाचा वर्षाव होत आहे.

     सदर बैठकीस पत्रकार संघाचे कार्याध्यक्ष संजय गायकवाड, उपाध्यक्ष विरेश मोडखरकर, चिटणीस रा. ऊ. म्हात्रे, सदस्य पंकज ठाकूर, महेश गायकवाड, सुयोग गायकवाड, पूजा चव्हाण आदी उपस्थित होते.

क्षणभर विश्रांती सामाजिक संस्थेचा आजी-आजोबा मोफत देवदर्शन उपक्रम २०२३ उत्साहात संपन्न

खोपोली (गुरुनाथ तिरपणकर) : क्षणभर विश्रांती सामाजिक संस्था वेळोवेळी शैक्षणिक, सांस्कृतिक आणी नाविण्यपुर्ण उपक्रम आयोजित करत असते. स्वातंञ्य दिनाचे औचित्य साधुन क्षणभर विश्रांती या संस्थेने दि.१५ ऑगस्ट २०२३ रोजी वृद्घा श्रमातील ४० आजी आजोबांना मोफत देवदर्शन घडविले.वयोवृद्ध आजी आजोबांना दैंनदिन जीवन जगताना मनाला असंख्य यातना सहन कराव्या लागतात.त्यामुळे म्हातारपणात देवदर्शन घेण्याचा प्रश्नच उदभवत नाही.वृद्धाश्रम हेच त्यांच्यासाठी मंदिर आणी वृद्धाश्रम चालवणारे हेच त्यांच्यासाठी देव.वृद्घाश्रमात असताना त्यांचा बाह्य जगाशी तितकासा संबंध येत नाही. त्यामुळे क्षणभर विश्रांती दरवर्षी हा उपक्रम आयोजीत करत असते.या उपक्रमात क्षणभर विश्रांती या संस्थेने आजी आजोबांना अष्टविनायकांपैकी महड चा गणपती वरदविनायक तसेच खोपोली येथील गगनगिरी महाराजांचा मठ यांचे दर्शन घडविले. आजी आजोबांच्या चेहर्‍यावर दिसणारा आनंद, त्यांच्या प्रतिक्रीया आम्हाला असे विविध उपक्रम आयोजित करण्यास प्रोत्साहन देतात असे क्षणभर विश्रांती च्या सदस्यांचे मत आहे. या प्रसंगी वरदविनायक संस्थान,गगनगिरी महाराज मठ संस्थान यांचे विशेष सहकार्य लाभले.सदर उपक्रमास तरुण मिश्रा,अनिशा राणे,श्रीराम वैदय, सतिश गुजर,प्रसाद पवार, एकनाथ दुदवडकर,भाव्या पवार, दिनेश परब,चंद्रकांत,सरीता परब, मानसी मोने,लकी सरमळकर, पिंकी रोकडे,सुरेखा परब,जोत्स्ना मॅडम तसेच वृद्घाश्रमातील आजी आजोबांचे काळजीवाहक यांचे विशेष सहकार्य लाभले.

क्षणभर विश्रांती सामाजिक संस्था आपल्या अमुल्य सहकार्याबदल खुप खुप आभारी आहे.

ज्ञान विकास विद्यालयाच्या २००५ च्या इयत्ता १० वी च्या बॅचने साजरा केला आगळा वेगळा गेट टुगेदर

कोपरखैरणे : री-युनियन इयत्ता १० वि डी व्ही एस बॅच 2005 आणि ज्ञान विकास संस्था यांच्या सहकार्याने शाळेचे माजी विद्यार्थी यांचा गेट टुगेदर चा कार्यक्रम आयोजित करण्यात आला होता. या कार्यक्रमाच्या आयोजनासाठी ज्ञान विकास संस्थेचे, संस्थापक अध्यक्ष ॲड. पी.सी. पाटील साहेब यांचे मार्गदर्शन लाभले

या कार्यक्रमाला ज्ञान विकास संस्थेचे माजी उपाध्यक्ष गजानन पाटील साहेब, माध्यमिक वि. मुख्याध्यापक सुदाम कापडणीस सर, तसेच प्राथमिक विद्यालयाचे मु. जगन्नाथ दळवी सर आणि शाळेतील इतर शिक्षक वर्ग सुद्धा उपस्थित होता..

    १८ वर्षाच्या प्रदीर्घ कालावधीनंतर सर्व मित्र-मैत्रिणी या निम्मिताने एकत्र आले होते आणि सर्वजण शाळेच्या जुन्या आठवणी मध्ये रमून गेले होते. कार्यक्रमाची सुरुवात शाळेची घंटा वाजवून करण्यात आली. त्यानंतर प्रार्थना आणि राष्ट्रगीत घेण्यात आले. सन्माननीय अतिथी आणि शिक्षकवर्ग यांच्या हस्ते दीपप्रज्वलन् करून पुढील कार्यक्रम सुरु केला. आलेल्या मान्यवरांचे पुष्पगुछच, नारळ, सन्मानचिन्ह देऊन सत्कार करण्यात आला. तसेच आलेल्या प्रत्येक विद्यार्थ्याला सुद्धा सन्मानचिन्ह देऊन सन्मानीत करण्यात आले. रि- युनियन् ग्रूप तर्फे शाळेला सदिच्छा भेट म्हणून पुस्तक रुपी भंडार देण्यात आले, सर्व मान्यवरांच्या हस्ते त्याचे अनावरण करण्यात आले.

    आलेल्या मान्यावरांनी सर्व विद्यार्थी मित्र परिवाराला मोलाचे मार्गदर्शन केले, कार्यक्रमात संतोष जाधव सर यांनी सादर केलेली कविता " भेटशील का मला तू १५ च्या नाक्यावर" या कवितेने पूर्ण सभागृह हर्षोल्हासित करून ठेवला.

 तसेच आलेल्या मित्र परिवारातर्फे काहींनी आपले मनोगत व्यक्त केले. या कार्यक्रमात आलेल्या जुन्या मित्र मंडळी द्वारा एक शालेय जीवन आणि कॉलेज जीवन या नाटिका सादर करण्यात आल्या तसेच, काहींनी सुंदर असे गाणे सुद्धा सादर केले.तदनंतर केक् कापून आणि ग्रूप फोटो क्लिक करण्यात आले. मग सर्वांनी स्नेहभोजन केले, तसेच त्यावेळी काही मित्र परिवार DJ च्या तालावर मस्त मनमुरादपणे डान्स करत् होता सर्व जण  बेभान होऊन नाचू गाऊ लागले होते.

   अशाप्रकारे नियोजित कार्यक्रम पार पडला. सर्वांनी या गेट-तुगेदर चा आनंद घेतला आणि मौजमजा केली, तसेच एक दिवस अविस्मरणीय वेळ आपल्या जुन्या मित्रा-मैत्रिणींसोबत घालवून आयुष्याचे सोने केले.या कार्यक्रमाचे आयोजन रि- युनियन् ग्रूप च्या वतीने करण्यात आला. या कार्यक्रमासाठी पूजा गवळी, सुषमा बोराटे, वैभव जगे, राहुल यादव, सतीश इरशेट्टी,मनोज भालेराव, कल्पेश पाटील आणी अजित म्हात्रे या विद्यार्थ्यांचे विशेष योगदान लाभले.

विरार-अलिबाग बहुउद्देशीय मार्गिका प्रकल्पाचे भूसंपादनाचे निवाडे १५ सप्टेंबरपासून जाहीर करणार -विभागीय आयुक्त डॉ. महेंद्र कल्याणकर

 नवी मुंबई, दि. 10 :- विरार-अलिबाग बहुउद्देशीय मार्गिका प्रकल्पाच्या भूसंपादनाचे निवाडे 15 सप्टेंबरपासून जाहिर करण्याचे आदेश विभागीय आयुक्त महेंद्र कल्याणकर यांनी दिले आहेत.

विरार-अलिबाग बहुउद्देशीय मार्गिका प्रकल्पाच्या भूसंपादन अधिकाऱ्यांची कार्यशाळा आज महाराष्ट्र राज्य रस्ते विकास महामंडळाचे  उपाध्यक्ष तथा व्यवस्थापकीय सहसंचालक राधेश्याम मोपलवार यांच्या प्रमुख उपस्थितीत कोकण भवन येथे पार पडली.

या कार्यशाळेत एमएमआरडीचे सह व्यवस्थापकीय संचालक संजय यादव, जिल्हाधिकारी ठाणे अशोक शिनगारे, जिल्हाधिकारी पालघर गोविंद बोडके, जिल्हाधिकारी रायगड डॉ. योगेश म्हसे, उपायुक्त अजित साखरे, उपायुक्त (भूसंपादन) रिता मैत्रेवार, अपर जिल्हाधिकारी हनुमंत आरगुंडे, यांच्यासह भूसंपादन उपजिल्हाधिकारी उपस्थित होते.

विरार-अलिबाग बहुउद्देशीय मार्गिका  128 कि.मी. लांबीचा असून, यात 16 मार्गिका राहणार आहेत.  या प्रकल्पासाठी जवळपास 1300 हेक्टर जमिनीचे संपादन केले जाणार आहे. भूसंपादनासाठी 22 हजार 500 कोटींचा खर्च अपेक्षित आहे. यापैकी 17 हजार 500 कोटी रुपये भूसंपादनासाठीचा लाभ देण्यासाठी उपलब्ध आहे. अशी माहिती डॉ. कल्याणकर यांनी यावेळी दिली. भूसंपादनाचे निवाडे जाहीर करण्याचे  काम विहित वेळेत सर्व यंत्रणांनी करावे, तसेच निवाडे देण्यासाठी शासनाने ठरवून दिलेल्या मार्गदर्शक तत्वांचा काटेकोरपणे अवलंब करावा, असे ही यावेळी सांगण्यात आले. भूसंपादन करताना आवश्यक असणाऱ्या विविध विभागांच्या समन्वयाने हे काम करावयाचे आहे. असे ही डॉ. कल्याणकर म्हणाले.

‘वॉर रुम’ची स्थापना

महाराष्ट्र राज्य रस्ते विकास महामंडळाच्या या महत्त्वकांक्षी प्रकल्पासाठी भूसंपादनाची प्रक्रिया जलद गतीने व्हावी, यासाठी विभागीय आयुक्त डॉ. महेंद्र कल्याणकर यांच्या मार्गदर्शनात कोकण भवन येथे ‘वॉररुम’ सुरु करण्यात येणार आहे.  भूसंपादनाचा मोबदला त्वरेने देण्यासाठी विहित कालावधी निश्चित करण्यात आला आहे.  त्यासाठी आवश्यक असलेली सर्व तयारी करण्यात आली असल्याची माहिती या कार्यशाळेत देण्यात आली.

संपूर्ण दिवसभर चाललेल्या या कार्यशाळेत बाजारमूल्य निश्चित करणे, महाराष्ट्र महामार्ग अधिनियम 1955 या कायदेतील भूसंपादन तरतूदी आणि भूसंपादन प्रक्रियेतील विविध बाबींवर सविस्तर सादरीकरण करण्यात आले.

नवीन पेन्शन योजना बंद करून जुनी पेन्शन योजना चालू करण्याची मागणी

उरण दि 10(विठ्ठल ममताबादे )सर्वांना जुनी पेन्शन योजना लागू होण्यासाठी देशव्यापी लढ्याची मागणी सर्व राज्यांत अधिकाधिक बळकट होत आहे. महाराष्ट्रा मध्ये संप काळात दि. २० मार्च २०२३ रोजी मा. मुख्यमंत्री महोदय यांच्या सोबत झालेल्या बैठकीतील ठरावानुसार नियमित आर्थिक लाभाची व सामाजिक सुरक्षेची पेन्शन लागु करावी यासाठी सरकारने समिती गठीत करून तीन महिन्यांत अहवाल सादर करण्याचे आदेश दिले व आता पुन्हा मुदतवाढ दिली, तसेच केंद्राने एनपीएसचा कायदा करुन हक्काची पेन्शन हिरावून घेतली. यासाठी राज्य सरकारी, जिल्हा परिषद, निमसरकारी, शिक्षक, शिक्षकेत्तर, चतुर्थ श्रेणी कर्मचारी, नगर पालिका, ग्राम पंचायत, कंत्राटी कर्मचारी यांचा देश पातळीवर नेतृत्व करणारा अखिल भारतीय राज्य सरकारी कर्मचारी महासंघाच्या वतीने फक्त एनपीएस रद्द करून जुनी पेन्शन ओपीएस योजना लागू करण्यासाठीच्या एकमेव मागणी करीता आता आरपारची लढाई करण्याचा कठोर निर्णय संबंधित सर्व संघटनांनी घेतला आहे.या अनुषंगाने उरणचे तहसीलदार उद्धव कदम यांना विविध मागण्या बाबतचे निवेदन देण्यात आले. यावेळी शासकीय निमशासकीय कर्मचारी संघटना रायगड जिल्हा समन्वय समितीचे सरचिटणीस संतोष पवार,शिवाजी सुर्यवाड , संदिप भंडारे , नितीन घरत , सुनील सुरवाडे, रूशाली पाटील, प्रियांका देवरे,बालाजी देशमुख आदी शासकीय अधिकारी कर्मचारी वर्ग उपस्थित होते.

मागण्या खालील प्रमाणे :- १) पीएफआरडीए कायदा रद्द करा/एनपीएस रद्द करा.२) सर्व कंत्राटी आऊट सोर्सिंग आणि रोजंदारी कामगार कर्मचारी यांना नियमित करा, सर्व रिक्त पदे तात्काळ भरा. तूर्त कंत्राटी कर्मचाऱ्यांना समान कामाला समान वेतन द्या.३)सरकारी व सार्वजनिक क्षेत्राचे खाजगीकरण थांबवा.४) आठवा वेतन आयोग स्थापन करा.

आदिवासी बांधवांना अन्न धान्य वाटप करून केला आदिवासी दिन साजरा

उरण दि. 10 (विठ्ठल ममताबादे ) संयुक्त राष्ट्र संघाने 9 ऑगस्ट 1994 रोजी 9 ऑगस्ट हा दिवस जागतीक आदिवासी दिवस म्हणून साजरा करण्याची घोषणा केली. आणि याच आदिवासी दिनाचे औचित्य साधून जे. एम. म्हात्रे चॅरिटेबल ट्रस्टचे प्रीतम म्हात्रे व आदिवासी बांधवासाठी रात्रंदिवस झटणारे सामाजिक कार्यकर्ते,आदिवासी मित्र, केअर ऑफ नेचर सामाजिक संस्थेचे संस्थापक रायगड भूषण राजू मुंबईकर यांच्या माध्यमातून अर्थातच केअर ऑफ नेचर सामाजिक संस्था महाराष्ट्र राज्य यांच्या माध्यमातून उरण तालुक्यातील चिरनेर येथील अक्कादेवी आदिवासी वाडी, माकडडोरा आदिवासी वाडी येथील बांधवाना तांदूळ, डाळ , गव्हाचे पीठ,साखर, चहा पावडर, मीठ बिस्कीट या प्रकारच्या जीवनावश्यक वस्तूंचे वाटप करण्यात आले. यावेळी आगरी कोळी कराडी संघर्ष सामाजिक संस्थेचे तालुका सचिव अनिल घरत यांच्यासह केअर ऑफ नेचर सामाजिक संस्थेचे पदाधिकारी कार्यकर्ते उपस्थित होते.

      आदिवासी बांधवांच्या सुख - दुःखात त्यांच्या मदतीला धाऊन जाणारे खऱ्या अर्थाने आदिवासी मित्र - सखा म्हणून परिचित असलेले प्रितम म्हात्रे,राजू मुंबईकर हे नेहमीच या आदिवासीं समाजाच्या प्रगती करिता करत असलेले प्रामाणिक कार्य सर्वांना प्रेरणादायी ठरणारं असचं आहे. स्वातंत्र्याचा अमृत महोत्सव साजरा होत असताना मात्र आदिवासीं बांधव आज ही उपेक्षितांचे जीवन जगत आहेत.

     गरिबी,अज्ञान,निरक्षरता,बालमजुरी,बेरोजगारी अश्या अनेक समस्यांना आजही आदिवासीं बांधवांना तोंड द्यावं लागतं आहे त्यातच समाजात, प्रीतम म्हात्रे,राजू मुंबईकर आणि इतर काही यांसारखी हाताच्या बोटावर मोजण्या इतकीच काही व्यक्तिमत्त्व आहेत की ती या विकासाच्या मुख्य प्रवाहापासून दूर असणाऱ्या आदिवासीं बांधवांना समाजाच्या आणि विकासाच्या मुख्य प्रवाहात आणण्यासाठी अहोरात्र झटतं आहेत, त्यांच्या करिता आशेचा किरण बनून उभे आहेत.आणि म्हणूनच आज हा समाज कुठेतरी स्वतःच्या हिंमतीवर,मेहनतीवर आपल्या पायावर खंबीरपणे उभा राहताना दिसत आहे.

कांदळवन संरक्षणव संवर्धनाच्या अनुषंगानेसर्व यंत्रणांनी समन्वय ठेवावा : डॉ. महेंद्र कल्याणकर

नवी मुंबई, दि. 10:- कांदळवन संरक्षण व संवर्धनाच्या अनुषंगाने शासकीय यंत्रणांनीसमन्वय ठेवून पर्यावरणाचा ऱ्हास होऊ नये यासाठी प्रयत्न करावे. अशा सुचना कोकण विभागीयआयुक्त महेंद्र कल्याणकर  यांनी दिल्या.    कोकण विभागीय आयुक्त कार्यालयाच्या सभागृहातकांदळवन संरक्षण व संवर्धनाच्या अनुषंगाने आयोजित करण्यात आलेल्या बैठकीत ते बोलत होते.या बैठकीस अप्पर प्रधान वनसंरक्षक(कांदळवन) एस. व्ही. रामराव उपस्थित होते.           

        कांदळवन संरक्षण व संवर्धनाच्या अनुषंगानेसर्व शासकीय यंत्रणा, संस्था, अधिकारी यांनी योग्य समन्वय ठेवून तत्परतेने आपल्या जबाबदाऱ्यापारपाडाव्यात तसेच पर्यावरणाचा ऱ्हास होऊ नये यासाठी विशेष प्रयत्न करावे अशा सुचनादिल्या. कांदळवनाच्या बाधित क्षेत्रावर तज्ञांच्या सल्ल्याने पून्ह:स्थापना करणे, तसेचया संदर्भातील तक्रारींचे निवारण करण्यासाठी मध्यवर्ती नियंत्रण कक्षासह एक स्वतंत्रजिल्हास्तरीय व्यवस्थापन कक्ष तयार करणे, त्याचबरोबर भारतीय वन अधिनियम 1927, वन(संवर्धन)अधिनियम 1980 व पर्यावरण (संरक्षण) अधिनियम, 1986 चा भंग होणार नाही याची दक्षता संबंधितांनीघ्यावी, असेही बैठकीत सांगितले.   यावेळी श्री. रामराव यांनी मा. उच्च न्यायालयाने वेळोवेळी दिलेल्या आदेशांच्याअंमलबजावणीबाबतच्या मासिक बैठकीच्या आढाव्याचे ईतिवृत्त कोकण विभागीय आयुक्तांच्यासंकेतस्थळावर नियमित प्रसिध्द करणे, राज्यातील संवेदनशील कांदळवन क्षेत्र निश्चित करुनया क्षेत्रावर पोलिस यंत्रणा, वनसंरक्षक, महाराष्ट्र सुरक्षा मंडळाचे सुरक्षारक्षकयांच्या मार्फत निगराणी ठेवणे, कांदळवन क्षेत्रात वाहनांना प्रवेश बंदी करण्यासाठीउपाययोजना करणे, या क्षेत्रात सीसीटिव्ही बसविणे, कांदळवन क्षेत्रावर उपग्रहाव्दारेनिगराणी ठेवून काही बदल निदर्शनास आल्यास समितीने त्यावर प्रतिबंधात्मक उपाययोजना करावी.या कामांचा वेळोवेळी आढावा घेण्यात येईल अशा सुचना श्री. रामराव यांनी यावेळी दिल्या.कांदळवन संदर्भातील विविध विषयांवर बैठकीत सविस्तर चर्चा करण्यात आली.

हनुमान देवाचा महाअभिषेक सोहळा

उरण दि ९(विठ्ठल ममताबादे )उरण तालुक्यातील करंजा कोंढरी गावचे आराध्य दैवत श्री हनुमान देवतेच्या मूर्तीचे ६ मे २०२३ रोजी एका समाजकंटकांने विटंबना केले होती.त्यानंतर संपूर्ण ग्रामस्थ यांनी ब्राह्मण सल्ल्यानुसार देवाचा अखंड सप्ताह नाम जप केले होते. त्यानंतर नुकताच संपूर्ण शास्त्रीय विधी नुसार देवाला शेंदूर लेपनाचा कार्यक्रम दिनांक ५ ऑगस्ट २०२३ रोजी करण्यात आला. आणि शेंदूर विसर्जन खोल समुद्रात वाजतगाजत मिरवणूक काढण्यात आली.आता येत्या २१ ऑगस्ट २०२३ रोजी देवाचा महाअभिषेक सोहळा आयोजित करण्यात आला आहे.तरी सर्व भाविक भक्तांनी या सोहळ्याला मोठया संख्येने उपस्थित रहावे असे आवाहन गावचे अध्यक्ष प्रकाश पाटील व कमिटी यांनी केले आहे.