अंबरनाथ / अविनाश म्हात्रे :- अंबरनाथचे प्राचीन शिवमंदिर हे भाविकांचे श्रद्धास्थान असून या प्राचीन शिवमंदिरात महाशिवरात्री निमित्त मोठी यात्रा भरते. कोरोना संकट काळात सलग दोन वर्ष महाशिवरात्रीची यात्रा बंद करण्यात आली होती, मात्र यंदा कोरोनाचा दर कमी झाल्याने किमान भाविकांना दर्शनाची सोय मंदिरात उपलब्ध करून द्यावी यासाठी भारतीय जनता पक्ष अंबरनाथ शहराध्यक्ष अभिजित गुलाबराव करंजुले-पाटील यांनी थेट राज्यपाल भगतसिंह कोश्यारी साहेब यांची भेट घेऊन या प्रकरणी लक्ष घालण्याची मागणी केली आहे. यावेळी झालेल्या चर्चेत अभिजित गुलाबराव करंजुले-पाटील यांनी प्राचीन शिवमंदिराचा इतिहास आणि त्याची आख्यायिका राज्यपालांना सांगितली, तसेच महाशिवरात्रीला प्राचीन शिवमंदिरात भाविकांना दर्शन उपलब्ध करून देण्यासाठी निर्णय होणे गरजेचे असून भाविकांच्या श्रद्धेच्या आड शासनाचे नियम येणार नाहीत याची काळजी घेण्याची मागणी त्यांनी केली. सलग दोन वर्ष भाविकांना महाशिवरात्रीच्या दिवशी मंदिर गाभाऱ्यात जाऊन दर्शन घेता आलेले नाही, त्यामुळे किमान यंदाच्या वर्षी भाविकांना प्राचीन शिवमंदिरात दर्शनाची सोय उपलब्ध व्हावी यासाठी शासनाला निर्णय घेण्यासंदर्भात सूचना कराव्यात अशी मागणी करंजुले यांनी केली.
कोणत्याही टिप्पण्या नाहीत:
टिप्पणी पोस्ट करा