सांगली: आयुष्यभर विद्यार्थी म्हणून राहता आले पाहिजे. नवनवीन ज्ञान आत्मसात करता आले पाहिजे. विद्यार्थी असताना तुम्ही तुमचे स्टेटस, तुमचे पद हे बाहेर ठेवून शिकता आले पाहिजे. जगात अशा अनेक गोष्टी आहेत जे अजून आपल्याला माहिती नाहीत. त्याचे जर ज्ञान मिळत असेल तर ते जरूर घेता आले पाहिजे. पत्रकारितेत अशा अनेक नवनवीन गोष्टी येत आहेत.
सांगली जिल्हा मराठी पत्रकार संघ व डिजिटल मीडिया परिषदेच्यावतीने सांगलीत 'डिजिटल मीडिया' कार्यशाळेचे आयोजन केले होते. शिवाजी विद्यापीठाने यासाठी पुढाकार घेतला होता.या कार्यशाळेला सर्व वयोगटातील पत्रकार व विद्यार्थी सहभागी झाले होते. मला या कार्यशाळेत विद्यार्थी म्हणून सहभागी होता आले. डिजिटल मीडिया हा एक नवीन प्लॅटफॉर्म उभा राहत आहे. पत्रकाराने नवीन गोष्टी आत्मसात न केल्यास ते बाजूला पडण्याची शक्यता आहे. पत्रकारांचे काम ज्यावेळी संगणकावर सुरू झाले, त्यावेळी संगणक न येणारे अनेक दिग्गज पत्रकार बाजूला पडले. याचे भान असणे गरजेचे आहे. त्यामुळे नवीन गोष्टींचा तातडीने स्वीकार केला पाहिजे.
कोणत्याही टिप्पण्‍या नाहीत:
टिप्पणी पोस्ट करा