मनुष्यप्राण्याच्या जीवनात येणारे बरे-वाईट प्रसंग त्या मनुष्याच्या गुण-अवगुणांची किंमत ठरवत असतात. आपल्यावर एखाद्याने कळत-नकळत उपकार केले असल्यास त्या उपकारकर्त्याचे स्मरण ठेवणे मनुष्यप्राण्याचे आद्य कर्तव्य ठरते. अशीच एक सत्य घटना आंध्र प्रदेशातील विजयवाडा येथे घडल्याचे वृत्त आहे. येथील श्री साईबाबा मंदिराच्या प्रवेशद्वारापाशी भीक मागून उदरनिर्वाह करणारे ७८ वर्षीय रेड्डी नामक गृहस्थ आहेत. हे गृहस्थ मुळात आळशी, कामचुकार अथवा गैरव्यसनी नसून अंगमेहनत करुन उदरनिर्वाह चालवणारे सद्वर्तनी वृत्तीचे आहेत. परंतु, वयोमानानुसार अंगमेहनत होत नसल्यामुळे त्यांना भीक मागण्याचा मार्ग पत्करावा लागला. भीक मागून सात दशकात मिळालेल्या अर्थलाभातून आठ लाख रुपये त्यांनी संबंधित श्री साईबाबा मंदिरामध्ये दान स्वरुपात अर्पण केले आहेत. रेड्डी यांनी परिस्थितीला शरण जाऊन भीक मागण्याचा मार्ग अवलंबला. त्यामुळे परिसरातील नागरिक आजपर्यंत त्यांच्याकडे भिकारी या नजरेने पाहत होते. परंतु, निर्व्यसनी असलेल्या रेड्डी यांनी भिकेतून मिळविलेले धन कोणत्याही वाम मार्गाने खर्च न करता दानधर्मासाठी खर्च केले. थोडक्यात, रेड्डी यांच्या सत्कर्मातूनच ते खरे श्रीमंत असल्याचे दिसून येते.
- सुधीर कनगुटकर
१/९, संतोष भगत चाळ,
बी. आर. नगर,
दिवा (पूर्व), ४०० ६१२.
कोणत्याही टिप्पण्‍या नाहीत:
टिप्पणी पोस्ट करा