बोगस डॉक्टरांना गोवंडीत अटक

मुंबई, दादासाहेब येंधे : डॉक्टरांची पदवी तसेच विशेष प्राविण्य नसताना देखील दवाखाना उघडून सर्वसामान्य नागरिकांच्या, रुग्णांच्या जीवाशी खेळणाऱ्या गोवंडी परिसरातील तीन डॉक्टरांना मुंबई गुन्हे शाखेच्या अँटॉप हिल पथकाने अटक केली आहे. कमलेश कुमार पटेल (५१), मेहबूब शेख (४० ), जयप्रकाश यादव (४८) अशी या डॉक्टरांची नावे आहेत. चुकीच्या इंजेक्शनमुळे मृत्यू झाल्याच्या दोन घटना याच शिवाजी नगर, गोवंडी परिसरात महिन्याभरात घडलेल्या आहेत. गोवंडी शिवाजीनगर येथील परिसर हा झोपडपट्टीचा असल्याने या ठिकाणी दवाखाने थाटून स्वस्तामध्ये उपचार, औषधे उपलब्ध करून दिली जातात. कुठलीही पदवी व प्रमाणपत्र विचारणारे येथे कुणीच येत नसल्याने या भागात बोगस डॉक्टरांचा सुळसुळाट झाला आहे. येथील रहिवाशांची मोठ्या प्रमाणात या डॉक्टरांकडून फसवणूक करण्यात येत आहे.  पोलीस निरीक्षक इंद्रजीत मोरे यांच्या मार्गदर्शनाखाली गुन्हे शाखा युनिट-४ पथकाने बोगस ग्राहक तयार करून या ठिकाणी छापा टाकला. यासाठी मुंबई महापालिकेच्या वैद्यकीय अधिकाऱ्यांची मदत घेण्यात आली. एकाचवेळी तीन दवाखान्यांवर छापा टाकून कमलेश कुमार, मेहबूब आणि जयप्रकाश यादव या तीन बोगस डॉक्टरांना अटक करण्यात आली. त्यांच्या दवाखान्याची झडती घेतली असता कोणताच परवाना तसेच वैद्यकीय प्रमाणपत्र आढळून आले नाही. कमी पैशात उपचार मिळत असल्याने झोपड्यांमध्ये राहणारे गरीब रहिवासी या अटक केलेल्या बोगस डॉक्टरांकडे जात होते. नागरिकांच्या अशिक्षितपणाचा आणि परिस्थितीचा गैरफायदा घेऊन हे डॉक्टर चुकीच्या पद्धतीने उपचार करत होते.