अलिबाग (जिमाका): जिल्ह्यातील अलिबागनजीकच्या आक्षी येथील शिलालेख हा मराठीतील आद्य शिलालेख म्हणून ओळखला जातो. सुमारे १ हजार ९ वर्षांपूर्वीच्या या शिलालेखाचे जतन करण्याच्या दृष्टीने जिल्हाधिकारी निधी चौधरी यांनी मुख्य कार्यकारी अधिकारी डॉ. किरण पाटील तसेच संचालक, पुरातत्व व संग्रहालय संचालनालय यांना आवश्यक ती कार्यवाही तात्काळ करण्याबद्दल लेखी सूचना दिल्या.
पुरातत्व संचालनालयातर्फे या शिलालेखाचे जतन करण्याच्या दृष्टीने पुढील उचित कार्यवाही होईपर्यंत हा शिलालेख आक्षी ग्रामपंचायत कार्यालयामध्ये सुरक्षितपणे ठेवण्यात यावा, असे जिल्हाधिकारी निधी चौधरी यांनी मुख्य कार्यकारी अधिकारी डॉ. किरण पाटील यांना सूचित केले.
या पार्श्वभूमीवर जिल्हा परिषदेचे मुख्य कार्यकारी अधिकारी डॉ.किरण पाटील यांनी स्वतः शिलालेख परिसरास भेट देत तात्काळ पुढील कार्यवाही सुरू करण्याच्या दृष्टीने पुरातत्व विभागाच्या अधिकाऱ्यांसोबतही संपर्क साधला. तसेच या शिलालेखास पुष्पहार अर्पण केला.
आजच्या मराठी भाषा संवर्धन दिनानिमित्ताने पालकमंत्री कु.आदिती तटकरे यांनीही आक्षी येथील हा प्राचीन मराठी शिलालेख व या परिसराचा पर्यटनदृष्ट्या विकास करण्यास आपण कटिबद्ध असून यादृष्टीने येथील मराठी प्राचीन शिलालेख व येथील परिसराचा विकास केल्यानंतर तसेच येथील जिल्हा परिषद शाळेत मराठी प्राचीन ग्रंथसंपदेचे दालन उभे केल्यास येथे येणारे पर्यटक देखील या स्थळास भेट देऊन स्वतःच्या ज्ञानात अधिक भर टाकू शकतील, असा विश्वास व्यक्त केला आहे.
कोणत्याही टिप्पण्‍या नाहीत:
टिप्पणी पोस्ट करा