कुसुमाग्रज म्हणजे काय ?
आज मराठी भाषा गौरव दिनी मला
एका मित्राचा संदेश आला,
"एखादी आजच्या दिवसाला
अप्रोप्रिएट अशी मराठीची
पोस्ट मला सेंड कर ना ! प्लीज !"
मातृभाषेपासून दूर राहणाऱ्या
पाप्याच्या पितरा.. (मनात)
हो पाठवतो ना तुला लगेच
ठेकाच घेतलाय मी भाषेचा,
साहित्याचा, सर्जनाचा अन
रसिकतेचाही ! आणि महत्त्वाचे
मित्रप्रेमाचाही !
"पण ही पोस्ट जिला सेंड करशील
तिला 'कुसुमाग्रज' माहिती कितपत ?"
माझा आपला भाबडा प्रश्न !
तो म्हणाला -
"जेमतेमच !"
"पण तिला माहिती आहे
नभातील एका ताऱ्याला
त्यांचे नाव दिलंय !
आणि तिने तिचं हृदय
मलाच दिलंय !"
थोडक्यात त्याला हवे
'लिमिटेड एडिशन'चे "कुसुमाग्रज !"
आता ऐक -
मध्यमवर्गीय समाजापासून
अलिप्त राहणाऱ्यांच्या
वृत्तीवर टीका करणारे -
"कुसुमाग्रज !"
दुर्बोधतेला नकार देणारे
आणि सामाजिकतेला स्वीकारणारे -
"कुसुमाग्रज !"
लेखकांच्या अतिरेकी विश्लेषणाला
विकृत आत्मनिष्ठेला
पढीक पांडित्याच्या कैदेत
अडकण्याला विरोध करणारे -
"कुसुमाग्रज !"
पारंपरिक अज्ञान,
जातीभेद आणि दारिद्रयाच्या
खाईत बेशुद्ध समाजाला
मानवतेची संजीवनी देणारे -
"कुसुमाग्रज !"
तिरसट, कडवट आणि
सहानुभूतिशून्य लेखन हेच
उत्स्फूर्त आणि प्रामाणिक
असे काव्य मानणाऱ्यांना -
खरे काव्य म्हणजे काय ?
हे सांगणारे -
"कुसुमाग्रज !"
साहित्यात अवतीर्ण होणार्‍या
नव्या पुरोहितशाहीवर
कोरडे ओढणारे -
"कुसुमाग्रज !"
'बांधिलकी' पेक्षा 'सामिलकी'
ही दौलत मानणारे -
"कुसुमाग्रज !"
"हे कळव तुझ्या डार्लिंगला
आणि कर सेलिब्रेट
'मराठी लैंग्वेज डे' तुझा
'As per her wish'
अगदी विशेष असा !
- हेमंत सुधाकर सामंत
कोणत्याही टिप्पण्‍या नाहीत:
टिप्पणी पोस्ट करा