ओमायक्रॉन या नव्या व्हेरिएंटचा धोका लक्षात घेऊन नागरिकांनी सतर्कता बाळगण्याचे जिल्हाधिकारी डॉ.महेंद्र कल्याणकर यांचे आवाहन
अलिबाग :- दक्षिण आफ्रिकेसह जगातील इतर काही देशांमध्ये कोविड-19चा घातक ओमायक्रॉन व्हेरिएंट आढळल्यामुळे महाराष्ट्रात विशेष काळजी घेण्याचे निर्देश मुख्यमंत्री उध्दव ठाकरे, उपमुख्यमंत्री अजित पवार, महसूल मंत्री बाळासाहेब थोरात यांनी राज्यातील आरोग्य यंत्रणेला दिले आहेत. या संदर्भात गठीत टास्क फोर्सने नव्याने काही मार्गदर्शक सूचनाही जारी केल्या आहेत. जागतिक स्तरावर सध्या ओमिक्रोन व्हेरीयंटचे एकूण 59 रुग्ण सापडले असून त्यामुळे करोनाची नवीन लाट येण्याची दाट शक्यता निर्माण झाली आहे.
या पार्श्वभूमीवर जिल्हाधिकारी डॉ.महेंद्र कल्याणकर यांनी आज जिल्हाधिकारी कार्यालयात प्रसारमाध्यम प्रतिनिधींशी संवाद साधला. यावेळी निवासी उप जिल्हाधिकारी डॉ.पद्मश्री बैनाडे, जिल्हा शल्य चिकित्सक डॉ.सुहास माने, जिल्हा आरोग्य अधिकारी डॉ.सुधाकर मोरे हे उपस्थित होते.
यावेळी प्रसारमाध्यम प्रतिनिधींना जिल्ह्यात झालेले एकूण लसीकरण, पहिला डोस झालेल्या व्यक्तींची माहिती तसेच दुसरा डोस प्रलंबित असलेल्या व्यक्तींची माहिती देण्यात आली. त्यानुसार अलिबाग तालुका 21 हजार 029,पेण तालुका 10 हजार 382, पनवेल महानगरपालिका क्षेत्र 72 हजार 592, उरण तालुका 14 हजार 78, खालापूर तालुका 14 हजार 995, कर्जत व रोहा तालुका 23 हजार 565, तळा तालुका 2 हजार 489, श्रीवर्धन तालुका 5 हजार 951, म्हसळा तालुका 5 हजार 252, माणगाव तालुका 10 हजार 516, महाड तालुका 12 हजार 035, पोलादपूर तालुका 4 हजार 725, सुधागड तालुका 4 हजार 755 आणि मुरुड तालुका 4 हजार 757 असे एकूण मिळून 2 लाख 7 हजार 171 नागरिकांचा दुसरा डोस अद्याप प्रलंबित असल्याची माहिती देण्यात आली.
जिल्हाधिकारी डॉ.कल्याणकर यांनी जिल्हा शल्य चिकित्सक डॉ.सुहास माने, जिल्हा आरोग्य अधिकारी डॉ.सुधाकर मोरे यांना कोविड लसीकरण मोहीम अधिक गतीने व नियोजनबद्ध लवकरात लवकर पूर्ण करण्याच्या, तहसिलदार, प्रांताधिकारी यांनीही कोविड लसीकरण, कोविड प्रतिबंधक उपाययोजना व्यवस्थितपणे राबविण्याबाबत सूचना दिल्याचे सांगितले तसेच त्यांनी कोविडविषयी भविष्यातील परिस्थितीचा विचार करता जिल्ह्यातील आरोग्य सोयीसुविधांबाबतच्या तयारीचीही माहिती दिली.
ओमायक्रॉन या विषाणूच्या नव्या व्हेरिएंटचे आव्हान चिंता वाढविणारे आहे. ओमायक्रॉन या व्हेरिएंटची घातकता लक्षात घेता कोणत्याही परिस्थितीत संसर्ग वाढता कामा नये, यासाठी एकूण परिस्थिती पाहता अजूनही ज्यांनी कोविड-19 लसीचा एकही डोस घेतला नाही त्यांनी आपल्या विभागातील शासकीय वैद्यकीय अधिकारी, आशा सेविका, अंगणवाडी सेविका किंवा तहसिलदार, प्रांत अधिकारी यांच्याशी त्वरित संपर्क साधावा. तसेच दुसरा डोस प्रलंबित असलेल्या नागरिकांनी त्यांच्या दुसऱ्या डोसबाबतचा विहित कालावधी पूर्ण झाल्याबरोबर आपला दुसरा डोसही घ्यावा. त्याचबरोबर दक्षिण आफ्रिकेत नव्याने सापडलेल्या ओमायक्रॉन व्हेरीएन्टचे रुग्ण पाहता जिल्ह्यातील नागरिकांनीही याबाबत हलगर्जीपणा न दाखवता सामाजिक अंतर पाळणे, हात वारंवार स्वच्छ धुणे, मास्क वापरणे याबाबत काटेकोरपणे सतर्कता बाळगावी, जबाबदारीने वागावे, जिल्ह्यात जास्तीत जास्त अँटीजन, आरटीपीसीआर चाचण्या कराव्यात, परदेशातून लोक मोठ्या प्रमाणावर मुंबईत व इतर ठिकाणी येणे सुरू झाले आहे. त्यापैकी अनेक जण देशांत इतरत्र उतरून देशांतर्गत विमान सेवेने, रस्ते व रेल्वेमार्गे येतात. त्यांच्यात कुणी विषाणूचा वाहक असेल तर इतरांना मोठा धोका होऊ शकतो त्यामुळे अशा प्रवाशांची माहिती नागरिकांना मिळाल्यास तात्काळ स्थानिक प्रशासनाला द्यावी, कॉन्टॅक्ट ट्रेसिंगसाठी सहकार्य करावे, असे आवाहन जिल्हाधिकारी डॉ.महेंद्र कल्याणकर यांनी या पत्रकार परिषदेच्या माध्यमातून नागरिकांना केले आहे.
जिल्हा शल्यचिकित्सक डॉ.सुहास माने व जिल्हा आरोग्य अधिकारी डॉ.सुधाकर मोरे यांनी ओमायक्रॉन या नव्या व्हेरिएंटबाबत पुढीलप्रमाणे विस्तृत माहिती दिली-
ओमायक्रॉन घातक का आहे ?
* कोविडच्या या नव्या विषाणूने दक्षिण आफ्रिकेतील यापूर्वीच्या डेल्टा व्हेरिएंट प्रकाराची जागा घेतली असून त्याचा संसर्ग कितीतरी अधिक आहे
* डेल्टा ची जागा ओमायक्रॉनने अवघ्या दोन आठवड्यात घेतली यावरून त्याची घातकता लक्षात येते
* दुसऱ्या लाट्स कारणीभूत असलेल्या डेल्टाचे दोन म्युटेशन होते. बेटा प्रकाराचे तीन म्युटेशन होते पण ओमायक्रॉन या प्रकाराचे पन्नासहून अधिक म्युटेशन आहेत.
* हा व्हेरिएंट सध्याच्या औषधांना, लसीला दाद देतो किंवा नाही ते डॉक्टर्स आणि तज्ञ जाणून घेत आहेत पण घाबरून न जाता आपण काळजी घेण्याची गरज आहे कारण याचा संसर्गाचा वेग पूर्वीच्या डेल्टापेक्षा कितीतरी जास्त आहे
* डबल मास्क घालणे योग्य राहील. सर्जिकल 3 प्लाय मास्क आणि एन 95 प्रकारातील एक मास्क घालणे उचित ठरेल
* खाताना किंवा जेवताना जेव्हा मास्क काढलेला असेल तेच अधिक संधानात बाळगणे गरजेचे
* आवश्यक गर्दी टाळा, आवश्यक असेल तरच प्रवास करा
* ज्यांनी लस घेतली नाही त्यांनी ती त्वरित घ्यावी
* ओमायक्रॉनला रोखण्याचा एकच मार्ग आहे - दुहेरी मास्क घाला, मोकळ्या हवेत राहा, आणि लसींचे दोन्ही डोस घ्या
कोणत्याही टिप्पण्‍या नाहीत:
टिप्पणी पोस्ट करा