धक्कादायक !!! एका अडीच वर्षांच्या चिमुरडीची बलात्कार करुन हत्या ! महाभयंकर कृत्यानंतर पेणमध्ये संतापाची लाट : नराधमाला अटक, जामीनावर बाहेर असताना केले कृत्य

पेण (देवा पेरवी/प्रदीप मोकल) :

     शहरातील मोतीराम तलावाशेजारील मळेघर वाडी येथील 3 वर्षांच्या चिमुरडीवर बलात्कार करुन तिची हत्या केल्याच्या घटनेनंतर पेणमध्ये संतापाची लाट उसळली आहे. या नराधमास पेण पोलिसांनी अटक केली असून, त्याने याआधीही बलात्कार व अपहरण अशा प्रकारचे गंभीर गुन्हे केले आहेत. जामीनावर बाहेर असताना हे संतापजनक कृत्य केले.आदेश मधुकर पाटील (वय 34) असे त्या नराधमाचे नाव आहे.

 

नराधम आदेश पाटील 

या घटनेची माहिती कळताच रायगडचे पोलीस अधीक्षक अशोक दुधे व अप्पर पोलीस अधीक्षक सचिन गुंजाळ यांनी घटनास्थळी भेट दिली व या नराधमाच्या मुसक्या आवळल्या.

 

याबाबत सविस्तर हकीकत अशी की, पेण शहरातील मोतीराम तलाव मार्गावरील पेण प्रायव्हेट हायस्कूल शाळेनजीक असलेल्या मळेघरवाडी या आदिवासी वाडीत पीडित चिमुरडी व तिचे कुटुंबीय राहत आहे. मंगळवारी (29 डिसेंबर) रात्री 11.30 वाजण्याच्या दरम्यान आदेश पाटील हा ती चिमुरडी राहत असलेल्या झोपडीजवळ गेला.

 

या आदिवासी कुटुंबियांच्या झोपडीला दार नसल्याचा फायदा घेऊन त्याने घरात झोपलेल्या 3 वर्षीय चिमुरडीला उचलून नेले. त्यानंतर सुमारे 200 ते 250 मीटर अंतरावर नेऊन चिमुरडीवर पाशवी बलात्कार केला व तिचा खून केला. यानंतर सदर मुलीचे प्रेत या नराधमाने आदिवासी वाडीतच आणून टाकले.

 

   पेण पोलीस ठाण्यात या संदर्भात तक्रार दाखल झाल्याबरोबर लागलीच पेण पोलिसांनी एका तासाच्या आत आदेश पाटील याला जेरबंद केले, अशी माहिती रायगडचे पोलीस अधीक्षक अशोक दुधे यांनी पत्रकार परिषदेत पत्रकारांना दिली.

 

   या नराधमाला पकडण्याकरिता व अधिक पुरावे जमा करण्याकरिता अलिबाग येथील श्वान पथकाची मदत घेण्यात आली. आदेश पाटील याच्याविरोधात पोलिसांनी अपहरण, बलात्कार, अ‍ॅट्रॉसिटी, पोस्को आदी कलमांतर्गत गुन्हा दाखल केला आहे. दरम्यान, बलात्कार व खून करणार्‍या नराधमावर फास्ट ट्रॅक कोर्टात केस चालविण्याची मागणी सामाजिक नेत्या वैशाली पाटील, आदिवासी समाजाचे नेते व समस्त पेणकरांनी केली आहे.

 

   दरम्यान, याप्रकरणी नराधमाला कडक शासन होण्याकरिता पोलीस अधीक्षक अशोक दुधे यांनी विशेष पथक नियुक्त केले आहे. या पथकामध्ये पेणच्या पोलीस उपाधीक्षक विद्या चव्हाण, पेणचे पोलीस निरीक्षक बाळकृष्ण जाधव, वडखळचे पोलीस निरीक्षक बाळा कुंभार, दादर सागरी पोलीस स्थानकाचे उपपोलीस निरीक्षक आव्हाड, उपनिरीक्षक पोमन, स्थानिक गुन्हे अन्वेषणचे पोलीस निरीक्षक महेश कदम यांची नियुक्ती करण्यात आली आहे.

सीसीटीव्ही लावण्याचे पेणकरांना आवाहन...

शाळा-कॉलेज, सोसायटी, व्यापारी, बंगले, कार्यालये, घर, हॉटेल, बँका, संस्था आदी ठिकाणी नागरिकांनी सीसीटीव्ही लावावे. तसेच नगरपरिषदेने गर्दीच्या ठिकाणी व शहरात येण्याच्या मार्गांवर त्याचप्रमाणे उद्याने या ठिकाणी सीसीटीव्ही लावावे, असे आवाहन पोलीस अधीक्षक अशोक दुधे यांनी केले आहे.